فلسطين
وبعد جاهين إيه يتقال
في حب مصر تغنى ومال
مصر يا ارض يا شمس يانيل
يا أجمل ناس وأروق ليل
من كثر ما قالوا فيكي كلام
قلبي في حبك غنى ومال
وفكروني بحبيبة قلبي
إلي هواها نيجري بدمي
الشمس تشرق عشان عيونها
وقمر الليل بحرس شجونها
حبيبتي عروسة بفستان ابيض
قامت عشانها قيامة الفرسان
لكن عروستي مهرها غالي
لاكنز الأرض ولا نجم السما العالي
ولا حتى القمر وهو بدر بيلالي
حبيبتي في عينيها بريق الماس
ورقة الضحكة وحب الناس
ولمعة براقة تغيّب الإحساس
افديها بالروح ورمشي ليها مداس
وقلبي على كفي هدية ليها خلاص
وعمري ليها وهبتو..ايامو ليها حراس
حبيبتي هناك
سهيت عيون حراسها
وفي ليلة القمر غاب عنها
خطفوها ولاد التايهة
اخدوها من حضن ولادها
غربوها عن أخواتها
لكن حبيبتي مهما الزمن طال
رأسها مرفوعة تهد جبال
وإحنا بعون الله أجيال ورا أجيال
نرجع لها الضحكة نكسر الأغلال
ونصلي في ارض الطهر
ونبوس ترابها
ونطول عنبها
ونطهرها
من ولاد التايهة
حبيبتي دي أمي وبنتي وأختي
اسقي ترابها بدمي
واروي عطشها بدمعي
حبيبتي مكللة بالغار
كل العيون عليها كبار وصغار
لكنها بعيدة .. ابعد من الشمس وسط السما
تنور الدنيا بنورها وهي النار
حبيبتي ضفايرها بلون الليل
طفلة بتتنطط من ميل لميل
وقلبي بيتنطط معاها وهو ليها دليل
ولما تيجي تنام عيني ليها سرير
ورمشي يغطيها ويقول لها المواويل
حبيبتي لو هافضل اغني فيكي وأقول
سنين عمري وعمر ولادي ومهما الزمن هيطول
أنا حبي ليكي اكبر من السما والأرض
وها فضل اغني وأقول فيكي ليوم العرض
حبيبتي دي أمي وأختي وبنتي
حبيبتي دي عرضي وناسي وأهلي
حبيبتي دي ارضي وبلدي ووطني
حبيبتي دي فلسطين
الشاعر المصري صلاح شاهين